Piälppáájäävri kirkko

Piälppáájäävri kirkko lii ohtâ puárásumosijn rakânâsâin tavemuu Säämist. Kirkko rahtui puáris anarâš tälvisiijdâ já markkânpääihi ohtâvuotân, Stuorrâ Piälppáájäävri riidon. Kirkko huksejui iivij 1754–1765 já vihkui anon 1763. Ovdil pääihist lâi 1600-lovo pelimuddoost huksejum Kunâgâtâr Kristiina kirkko. Puáris markkânpäikki uáinoo pirrâsist syeinikieddin, mutâ kirkkokiedi kirkkotuveh já pappâl láá lappum uáinusist masa ollásávt. Kiirkon rahtii stuorrâ uđâsmitmijd 1840-lovvoost, já siste tot lii ain viehâ ennuv toi uđâsmitmij miäldásâš. Toi aaigij hirsâseeinijd skođâstii ulguubeln viällud orroo luovdijguin. Kirkko lii tastoo lamaš ävđin 1888 / 1892 / 1800-lovo loopâ rääjist, ko tááláš Aanaar kylá šodâškuođij Juvduu njáálmán. Taan ääigi Piälppáájävri lii piivnoh sehe vihkâkirkkon já mokkemätkičuosâttâhhân, já tobbeen uárnejuvvojeh jyehi ive jonsahpeivi- já pessijâšimmeelpalvâlusah. Piälppáájäävri kirkkopiirâs hämmee áinoošlajâsii olesvuođâ. Kirkkokiedi kuávlu kulá väldikodálávt merhâšittee huksejum kulttuurpirrâsân Anarâšâi varriistâllâm tälvi- já kesipääihih (RKY) já kirkko lii suojâlum kirkkolavváin. Piälppáájäävri kirkkokieddi já Aanaarjäävri hävdisuolluuh hämmejeh väldikodálávt mávsulii fastâ toovlášpasâttâsolesvuođâ (VARK). Piälppáájävri kulá meid väldikodálávt mávsulij enâdâhkuávlui (VAMA) juávkun uássin Aanaarjäävri já Juvduu enâdâhkuávlu. Kieddi lii lasseen mávsulâš ärbivyehienâdâh, mon ärbivyehibiotoop lii ive 2000 rääjist hoittájum nijttemáin já savzâiguin. Čääiti ucceeb